Þá er komið að því. Ari Ólafsson stígur annar á svið í Eurovision söngvakeppninni sem fram fer í Lissabon í Portúgal í kvöld. Frambjóðendur Samfylkingarinnar á Akureyri fara ekki varhluta af spenningnum og bregða á leik í tilefni dagsins með því að „mæma“ nokkur af  eftirminnilegustu Eurovision lögum sögunnar.

Hilda Jana Gísladóttir fjölmiðlakona leiðir listann og ríður jafnframt á vaðið í myndbandinu.

„Það er einfaldlega þannig að Eurovision er heilög stund á mínu heimili. Fyrsta ástin í lifi mannsins míns er Eurovision stjarna. Þetta er fyrir þig Ingvar minn,“ segir Hilda en lagið sem um ræðir er J´amie la vie, sem hin 13 ára gamla Sandra Kim flutti svo eftirminnilega árið 1986.

Fleiri frambjóðendur bregða síðan á leik og flytja lög á borð við La det swinge og Fly on the wings of love.