Arsenal tók á móti Atletico Madrid í fyrri leik liðanna í undanúrslitum Evrópudeildarinnar í kvöld en leiknum lauk með 1-1 jafntefli.

Sime Vrsaljko, bakvörður gestanna fékk að líta rauða spjaldið á 10. mínútu og leikmenn Atletico því einum færri en það var Alexandre Lacazette sem braut ísinn á 61. mínútu með laglegu skallamarki.

Antoine Griezmann jafnaði hins vegar metin fyrir Atletico á 82. mínútu og lokatölur því 1-1.

Arsene Wenger, stjóri Arsenal var ósattur með markið sem liðið fékk á sig í kvöld.

„Ef maður horfir á það hvernig leikurinn spilaðist þá hefðu úrslitin ekki getað verið verri fyrir okkur en við verðum að vera jákvæðir fyrir síðari leikinn,“ sagði Wenger.

„Því miður þá gáfum við þeim mark á silfurfati en núna tekur bara næsti leikur við. Eins og leikurinn spilaðist þá finnst mér að við hefðum getað klárað einvígið hérna í kvöld. Markmaðurinn þeirra var í stuði og þeir fengu eitt færi og skoruðu. Þeir sköpuðu sama og ekkert og það er jákvætt.“

„Ef við spilum eins og við gerðum í kvöld á Spáni þá förum við áfram, ég er sannfærður um það,“ sagði Wenger að lokum.