Arsenal tók á móti West Ham í ensku úrvalsdeildinni í dag en leiknum lauk með 4-1 sigri heimamanna.

Nacho Monreal kom Arsenal yfir í upphafi síðari hálfleiks en Marko Arnautovic jafnaði metin fyrir West Ham, nokkrum mínútum síðar.

Aaron Ramsey kom Arsenal svo í 2-1 áður en Alexandre Lacazette bætti við tveimur mörkum til viðbótar og lokatölur því 4-1 fyrir Arsenal.

Aaron Ramsey, markaskorari Arsenal segir að síðustu dagar hjá félaginu hafi verið undarlegir.

„Síðustu dagar hafa verið skrítnir og þetta hefur tekið á marga. Stjórinn hefur alltaf haft mikla trú á okkur og hann gaf okkur tækfæri hérna,“ sagði Ramsey.

„Ég kom hingað þegar að ég var 17 ára og ég á honum mikið að þakka. Hann á skilið mikið hrós fyrir allt sem hann hefur gert og vonandi getum við klárað þetta tímabil almennilega fyrir hann.“

„Að vinna Evrópudeildina yrði frábært kveðjuteiti fyrir hann og við ætlum okkur að klára það verkefni fyrir hann,“ sagði hann að lokum.