Halldór Halldórsson er oddviti sjálfstæðismanna í borgarstjórn.

Orðið á götunni er að kurr sé í sjálfstæðismönnum með blaðamannafund Dags B. Eggertssonar borgarstjóra og þriggja ráðherra ríkisstjórnarinnar fyrir helgi, þar sem kynnt var útspil ríkis og borgar í húsnæðismálum.

Meirihlutinn í borginni hefur verið í töluverðri vörn í húsnæðismálunum og sjálfstæðismenn í borgarstjórn sótt nokkuð í sig veðrið að undanförnu. Það kom því mörgum á óvart að ríkisstjórnin skyldi óvænt kynna samstarf við borgarstjórn á þessum tímapunkti.

Athygli vakti að enginn ráðherra úr Sjálfstæðisflokknum var á staðnum, en þeir Benedikt Jóhannesson fjármálaráðherra og Þorsteinn Víglundsson úr Viðreisn voru mættir ásamt Björt Ólafsdóttur úr Bjartri framtíð.

Ekki er enn ljóst hvort Viðreisn og Björt framtíð bjóða fram í næstu borgarstjórnarkosningum. Björt framtíð tilheyrir nú meirihlutanum að baki borgarstjóra, en Viðreisn var ekki til þegar síðast var boðið fram.

Innan Sjálfstæðisflokksins telja margir að útspilið fyrir helgi tengist mögulega sameiginlegu framboði Samfylkingar, Bjartrar framtíðar og Viðreisnar í komandi kosningum eða kosningabandalagi þessara þriggja flokka.

Innan Samfylkingarinnar hafa menn hins vegar áhyggjur af því að óvinsældir ríkisstjórnarinnar smitist yfir á meirihlutann í borginni, ekki síst vegna stöðunnar í heilbrigðismálum þar sem borgarfulltrúinn fyrrverandi, Óttarr Proppé, ræður ríkjum. Jafnframt er bent á að Benedikt Jóhannesson leggi sem formaður Viðreisnar og fjármálaráðherra sín fyrstu fjárlög í haust og þau verði að líkindum harkalega gagnrýnd á kosningavetri.

Orðið á götunni er að Halldór hafi átt sterkan leik í kvöldfréttum RÚV í gær, þar sem hann var spurður um þessi tíðindi.

Halldór svaraði:

„Það er verið að tala um 2.000 íbúðir þarna, þær bætast þá við allar þúsundirnar sem eru í glærunum hans Dags B. Eggertssonar, borgarstjóra. Fólk hefur ekki getað flutt inn í þær glærur ennþá þannig að því miður bætist þetta bara þar við.“