Halldór Smári Sigurðsson, leikmaður Víkings, var ekki ánægður með varnarleik liðsins í kvöld í 3-2 tapi gegn Breiðabliki.

,,Eins og í öllum hinum leikjunum þá erum við að spila vel en við erum samt að tapa. Það eru þessi föstu leikatriði sem eru að drepa okkur,“ sagði Halldór.

,,Þú þarft ekki að vera góður í fótbolta til að verjast föstum leikatriðum svo þetta er algjört bull í rauninni.“

,,Við vorum að spila ágætlega þó við höfum strax lent undir, við fengum okkar færi og settum eitt snemma í seinni.“

Milos Milojevic yfirgaf Víking á dögunum og segir Halldór að það hefði litlu skipt þó hann hefði verið á hliðarlínunni.

,,Þetta var frekar óvænt en ég held að við höfum náð að þjappa okkur vel saman fyrir þennan leik og vorum klárir. Ég held að það hefði engu skipt hefði Milos verið á hliðarlínunni eða ekki.“