Gylfi Þór Sigurðsson, miðjumaður Everton og íslenska landsliðsins er meiddur þessa stundina.

Hann meiddist á hné í leik Everton og Brighton fyrr í þessum mánuði og í fyrstu var óttast að hann myndi missa af HM í Rússlandi sem fram fer í sumar.

Endurhæfing Gylfa gengur hins vegar vel og vonast hann til þess að ná síðustu leikjum Everton á tímabilinu.

„Endurhæfingin gengur mjög vel og mér líður alltaf betur og betur. Ég er hættur að nota hækjur og er ekki lengur með hnéspleku og er nánast byrjaður að geta gengið eðlilega,“ sagði Gylfi við heimasíðu Everton á dögunum.

„Endurhæfingin er krefjandi og ég eyði miklum tíma með sjúkraþjálfurum liðsins og í sundlauginni. Það er hins vegar að skila árangri og mér líður miklu betur í dag. Við höfum lagt mikla áherslu á það að minnka bólguna í hnénu og auka hreyfigetuna og það gengur vel.“

„Ég fer og hitti sérfræðing í næstu viku og hann mun meta stöðuna á mér og svo sjáum viðtil með framhaldið,“ sagði Gylfi meðal annars.

Gylfi viðurkennir að það hafi tekið á að meiðast á þessum tímapunkti en hann er meðvitaður um það að margir knattspyrnumenn þurfa að ganga í gegnum meiðsli á ferlinum.

„Það er hluti af þessu, að meiðast og menn þurfa bara að taka því og reyna að komast í gegnum það,“ sagði Gylfi.

„Ég er ekki mjög þolinmóður að eðlisfari ef ég á að vera hreinskilinn og ég vil oftast klára hlutina með hraði. Ég geri mér hins vegar grein fyrir því að þetta mun taka tíma og ég má ekki drífa mig um of.“

„Líkaminn þarf sinn tíma til þess að jafna sg og ég þarf að hlusta vel á líkamanna. Ég hef verið mjög heppinn með meiðsli á mínum ferli og vonandi kem ég bara sterkari tilbaka eftir þetta,“ sagði Gylfi að lokum.