Voru stöðvaðir af lögreglu
Lögreglan á höfuðborgarsvæðinu handtók tvo menn á athafnasvæði Eimskipa við Sundahöfn á þriðja tímanum í nótt. Í dagbók lögreglu kemur fram að mennirnir, sem eru hælisleitendur, hafi reynt að komast um borð í millilandaskip. Þeir voru vistaðir í fangageymslu lögreglu.
Þá voru sex ökumenn stöðvaðir í gærkvöldi og í nótt vegna gruns um akstur undir áhrifum áfengis eða fíkniefna. Þar á meðal var einn sautján ára ökumaður sem ók gegn einstefnu á Vesturgötu rétt fyrir klukkan tvö í nótt. Hann er grunaður um akstur undir áhrifum fíkniefna og var foreldri gert viðvart, að sögn lögreglu.
Tilkynnt var um slys á veitingahúsi við Austurstræti klukkan tvö í nótt, en þar hafði kona dottið og fengið sár á höfuðið. Þá var tilkynnt um reiðhjólaslys a Krísuvíkurvegi rétt fyrir klukkan sjö í gærkvöldi, en þar hafði maður dottið af reiðhjóli. Hann var fluttur með sjúkrabifreið á Slysadeild og er mögulega viðbeinsbrotinn.