Lára Zulima Ómarsdóttir, fyrrverandi fréttakona og leiðtogi almannatengsla hjá Pipar/TBWA, er ósátt við það sem hún kallar græðgi fyrirtækja við Laugaveg 26. Byrjað hafi verið að rukka í stæði allan sólarhringinn og nú fyllist stæðin við Grettisgötu sem íbúar þurfi að nota. Fyrirtækin segja eiganda hússins hafa tekið ákvörðun um gjaldtöku.
„Ég verð að fá að lýsa yfir megnri óánægju minni með það að Verzlanahöllin og hin fyrirtækin við Laugaveg 26 séu búin að setja upp gjaldskyldu á stæðunum hjá sér,“ segir Lára í færslu í íbúagrúbbu Miðborgarinnar á samfélagsmiðlum.
Nefnir hún að það sé dýrara að leggja þar en við Grettisgötu sem þýðir að viðskiptavinir verslunarinnar komi til með að leggja þar og teppa bílastæðin sem íbúarnir þurfa að nota.
„Svo eru þau að rukka allan sólarhringinn sem þýðir líka að fólk hvaðan æva að kemur til með að taka öll þessi örfáu stæði sem við íbúarnir hafa aðgang að,“ segir Lára.
Spyr hún hvað sé hægt að gera. Kvarta til borgarinnar eða setja þrýsting á fyrirtækin þarna að hætta við þetta.
„Hvað finnst ykkur sem búið hér í nágrenninu um þessa græðgi?“ spyr hún.
Forsvarskona Verzlanahallarinnar svarar Láru hins vegar og segir að þetta sé ekki í höndum verslunarinnar.
„Eigandi hússins ákveður þetta, við sem leigjendur ákváðum þetta ekki. Okkar viðskiptavinir greiða ekki fyrir stæðin okkar, þannig það verður ekki breyting vegna þessa,“ segir hún. „Eigandi hússins ákvað að ganga í þetta vegna þess að íbúar götunnar og fólk sem á önnur erindi en í húsið á Laugavegi 26 hafa hingað til ekki virt þessi einkastæði.“
