Framkvæmdastjóri Manchester United, Omar Berrada, segir nýjustu fjárhagsuppgjör félagsins sýna skýrt árangur þeirra breytinga sem ráðist hefur verið í utan vallar.
Í uppgjöri annars ársfjórðungs kemur fram að rekstrarhagnaður er kominn upp í 19,6 milljónir punda, samanborið við aðeins 3,1 milljón á sama tímabili í fyrra.
Þetta er athyglisvert í ljósi þess að liðið spilar ekki í Evrópukeppni og féll snemma úr báðum bikarkeppnum á Englandi.
Heildarrekstrarhagnaður fyrstu sex mánuði rekstrarársins nemur nú 32,2 milljónum punda, en á sama tíma í fyrra tapaði félagið 3,9 milljónum.
Berrada telur að erfiðar ákvarðanir, þar á meðal niðurskurður á um 450 störfum undir stjórn INEOS, séu nú farnar að skila sér. Launakostnaður hefur lækkað um 7,4 milljónir punda og stendur nú í 75,1 milljón.
„Við erum nú farin að sjá jákvæð áhrif breytinganna, bæði hvað varðar kostnað og arðsemi,“ sagði Berrada.
