Richard Hughes yfirmaður knattspyrnumála hjá Liverpool ræddi opinskátt um samstarf sitt við þjálfarann Arne Slot og segist fullviss um að dýru leikmannakaupin muni skila sér.
Í hlaðvarpinu The Reds Roundtable sagði Hughes að skýr verkaskipting ríkti innan félagsins. „Allt sem snýr að leikdegi, liðsvali og taktík er á borði þjálfarans. Það er hans svið og mikilvægt að stíga ekki yfir þau mörk,“ sagði hann.
Hann bætti við að þeir ræði frammistöðu og fótbolta almennt, en leyfi Slot alltaf að leiða þær umræður.
Liverpool keypti marga leikmenn fyrir háar upphæðir í sumar og hafa sumir þurft tíma til að aðlagast ensku úrvalsdeildinni. Hughes segir það eðlilegt. „Ungir leikmenn sem koma úr öðru umhverfi þurfa tíma til að aðlagast. Við viljum styðja þá utan vallar en ekki kæfa þá,“ sagði hann.
Að lokum lagði hann áherslu á að leikmennirnir væru keyptir af ástæðu. „Þeir eru toppleikmenn og við vorum öll ánægð með sumargluggann.“
