Tottenham mun missa Fabio Paratici eftir lok janúar-gluggans, aðeins fjórum mánuðum eftir að hann sneri aftur til félagsins í formlegu hlutverki.

Paratici, sem er 53 ára gamall Ítali, starfaði áður sem yfirmaður knattspyrnumála hjá Tottenham frá júní 2021 þar til hann neyddist til að segja af sér í apríl 2023 vegna meintrar aðkomu sinnar að fjármálamisferli hjá fyrrverandi félagi sínu, Juventus.

Hann var í kjölfarið settur í 30 mánaða bann frá allri knattspyrnustarfsemi af ítalska knattspyrnusambandinu, bann sem FIFA útvíkkaði á heimsvísu.

Þrátt fyrir bannið hélt Paratici áfram að ráðleggja Tottenham sem ráðgjafi og var í október skipaður annar tveggja íþróttastjóra félagsins, ásamt Johan Lange, þegar banninu lauk.

Nú liggur fyrir að Paratici yfirgefur félagið í næsta mánuði, en persónulegar ástæður eru sagðar liggja þar að baki. Samkvæmt ítölskum miðlum er hann líklegur til að taka við yfirstjórn knattspyrnumála hjá Fiorentina, sem mun hafa haft samband við hann með langtímasamning í huga.