Roy Keane hefur upplýst að knattspyrnustjóri Newcastle United, Eddie Howe, væri hans fyrsta val til að taka við starfi knattspyrnustjóra Manchester United í kjölfar brottreksturs Ruben Amorim.
United rak Amorim á mánudag eftir að hann gagnrýndi yfirstjórn félagsins harkalega í kjölfar 1-1 jafnteflis gegn Leeds United um síðustu helgi. Darren Fletcher stýrði liðinu tímabundið í 2-2 jafntefli gegn Burnley á miðvikudag á meðan félagið leitar að bráðabirgðastjóra út tímabilið.
Nöfn á borð við Ole Gunnar Solskjær, Ruud van Nistelrooy og Michael Carrick hafa verið nefnd, en United situr nú í sjöunda sæti deildarinnar eftir þrjú jafntefli í röð.
Í viðtali við Sky Sports sagði Keane að Solskjær gæti staðið sig ágætlega út tímabilið, en hann sæi hann ekki sem langtímalausn. Þegar hann var spurður hvern hann myndi sjálfur ráða svaraði Keane. „Ég myndi velja Eddie Howe.“
Keane hrósaði Howe fyrir störf hans hjá Newcastle og fyrr hjá Bournemouth, rósemi hans og stjórnunarhæfileika.
Hann taldi að United þyrfti einmitt slíkan stöðugleika og bætti við að Howe hefði skilað árangri, meðal annars með Meistaradeildarsæti og bikarmeistaratitli.
