Fyrr í dag var birt á X-síðu lögreglunnar í Finnlandi dramatískt myndband af því þegar sérsveit hennar fór um borð í skip, sem grunur leikur á að beri ábyrgð á skemmdum á sæstrengjum, tók þar við stjórn og handtók alla áhafnarmeðlimi.
Fram kemur í umfjöllun Aftonbladet að skipið heiti Fitburg en umrædd sérsveit gangi undir nafninu Bjarnardeildin (s. Björnligan). Sérsveitinni var flogið að skipinu með þyrlu og seig úr henni um borð í skipið en í myndbandiu má síðan sjá sveitina með byssur á lofti halda upp í brú skipsins en engir meðlimir áhafnar þess sjást í myndbandinu.
Grunur leikur að skipið standi á bak við skemmdarverk sem gerð voru á sæstrengjum í Finnska flóa nú um áramótin en flóinn skilur að Finnland, í norðri, Eistland í suðri og Rússland í austri.
Skipið var á svæðinu þegar sæstrengirnir skemmdust en grunur leikur á að skipið hafi dregið akkeri sitt langa leið og þannig skemmt strengina. Við rannsókn málsins uppgötvaðist að löng slóð af braki var á eftir skipinu sem þótti renna enn frekari stoðum undir að það stæði á bak við skemmdirnar en sæstrengirnir náðu á milli Eistlands, Finnlands og Svíþjóðar. Fitburg er flutningaskip sem siglir undir fána smáríkisins St Vincent & Grenadine, sem er eyríki í Karíbahafi en þar búa eilítið færri en í Reykjavík. Skipið var á leiðinni frá Sankti Pétursborg í Rússlandi til Haifa í Ísrael.
Fjórtán manna áhöfn skipsins var handtekin og því siglt til hafnar í Kirkkonummi sem er sveitarfélag í nágrenni Helsinki, höfuðborgar Finnlands, öllum nema einum mun þó hafa síðar verið sleppt og þessi eini mun vera grunaður um að bera ábyrgð á skemmdarverkunum á sæstrengjunum, sem voru nýttir af fjarskiptafyrirtækjum.
Hvort viðkomandi er skipstjórinn kemur ekki fram. Hann hefur verið úrskurðaður í gæsluvarðhald en maðurinn er frá Aserbaíjan. Aðrir áhafnarmeðlimir eru frá því landi sem og Rússlandi, Georgíu og Kasakstan.
Myndbandið af töku skipsins má sjá hér fyrir neðan.
Suomen viranomaiset ottivat Fitburg-nimisen aluksen haltuun yhteisoperaationa 31.12.2025.
Finska myndigheter beslagtog ett fartyg vid namn Fitburg i en gemensam operation.
Finnish authorities took control of the vessel as part of a joint operation.#Finland #BalticSea #poliisi pic.twitter.com/qBm6bcHF7u
— Suomen poliisi (@SuomenPoliisi) January 4, 2026
