„Þetta er lífsreynsla sem ég mun aldrei gleyma. Að koma á þennan vettvang var svo óhugnanlegt að það er varla hægt að lýsa því,“ segir Birgir Þórarinsson, fyrrverandi þingmaður, í nýjasta þætti Dagmála á mbl.is.

Fjallað er um efni þáttarins á mbl.is, en tilefni orða Birgis eru ummæli tónlistarmannsins Páls Óskars Hjálmtýssonar í Bítinu á dögunum sem Vísir fjallaði um. Þar var rætt við Pál Óskar um Eurovision og það hvort Ísland ætti að senda sitt framlag í keppnina í ljósi þátttöku Ísraels. Á þessum tímapunkti var ekki búið að taka ákvörðun um að sitja heima.

Sjá einnig: Birgir segir börn víst hafa verið afhöfðuð

Í þættinum sagðist Páll Óskar ekki „nenna að hlusta á sjöunda október rökstuðninginn enn og aftur“.

Lét Páll Óskar þessi orð falla eftir að hann benti á að Rússum hefði verið vikið úr Eurovision fyrir að ráðast á Úkraínu. Heimir Karlsson spurði hann hvort það væri raunverulega sambærilegt og benti honum á að í tilviki Ísraels hefði Hamas ráðist á þá.

Eins og fjallað hefur verið um var Birgir einn af 16 þingmönnum frá ýmsum Evrópulöndum sem fóru til Ísraels eftir voðaverk Hamas í október 2023. Hann hefur lýst þeim hörmungum sem fyrir augu bar og í Dagmálum segir hann að þetta sé lífsreynsla sem hann muni aldrei gleyma. Hann gagnrýnir ummæli Páls Óskars og segist tilbúinn að hitta hann til að fara yfir málið.

„Mér finnst þetta ákaflega sorgleg ummæli og í rauninni forkastanleg. Ég vildi óska þess að Páll Óskar hefði komið með mér til Ísraels og ég er sannfærður um að ef hann hefði gert það þá hefði hann aldrei látið þessi orð falla,“ segir hann meðal annars í þættinum.

Nánar er fjallað um málið hér.