Stephen Bradley, þjálfari írska liðsins Shamrock Rovers, gagnrýndi Heimi Hallgrímsson, landsliðsþjálfara Íra, fremur harðlega hér á landi í síðustu viku.

Ræddi Bradley við fjölmiðla í tilefni leiks Shamrock við Breiðablik í Sambandsdeildinni á Laugardalsvelli, sem Blikar unnu og héldu sér á floti í keppninni á meðan Shamrock er úr leik.

Bradley var ósáttur við Heimi vegna áforma hans um að nota leikmenn úr írsku deildinni í landsliðsverkefni í janúar. Sagði hann ekki koma til greina að Heimir notaði sína leikmenn þar sem þeir þyrftu hvíld eftir erfitt tímabil og fram að því næsta.

„Þessi þjálfari labbar inn í Leifsstöð og ákveður að breytast í óvin þjóðar strax, sturtar sér yfir Heimi Hallgríms og talar niður til okkar. Þetta er bara pappakassi. Þú mætir ekki til Íslands og bókar þrjú stig,“ sagði Haraldur Hróðmarsson um málið í þættinum Mín Skoðun.

Fjölmiðlamaðurinn reynslumikli Valtýr Björn Valtýsson stýrir þættinum og baunaði hann einnig vel yfir Bradley. „Maður sem að sturtar yfir Heimi Hallgríms í Leifsstöð, það á bara að snúa honum við og senda hann úr landi. Þarna fór hann nálægt hjarta Íslendingsins.“

Haraldur tók til máls á ný. „Ef leikmenn hans eiga möguleika á að komast í landsliðið og á stærra svið verður hann bara að kyngja því og leysa það mál,“ sagði hann.