Oliver Glasner, stjóri Crystal Palace, er meðal þeirra sem gætu komið til greina hjá Chelsea ef Enzo Maresca lætur af störfum á Stamford Bridge. Þetta kemur fram í umfjöllun The Sun.

Maresca er sagður undir pressu eftir erfiðan kafla hjá Chelsea, en liðið vann ekki í fjórum leikjum í röð áður en það lagði Everton um helgina. Í kjölfarið lét Ítalinn í ljós mikla óánægju með stöðuna innan félagsins.

„Síðustu 48 klukkustundir hafa verið þær verstu síðan ég kom hingað,“ sagði Maresca eftir leikinn.

Samkvæmt enskum blöðum beindust þessi ummæli að stjórn og yfirstjórn Chelsea, þar sem Maresca telur sig ekki hafa fengið nægilegan stuðning á undanförnum vikum. Orð hans hafa aukið vangaveltur um framtíð hans, þrátt fyrir sigurinn gegn Everton.

Ef til stjórnarskipta kemur er Oliver Glasner, talinn koma sterklega til greina, en hann hefur gert ansi góða hluti með Palace. Gerði hann liðið til að mynda að bikarmeisturum í vor.

Liam Rosenior, stjóri systurfélags Chelsea, Strasbourg, er einnig nefndur sem mögulegur kostur. Hefur hann skilað góðu starfi með franska liðið og er það á toppi Sambandsdeildarinnar til að mynda þegar aðeins ein umferð er eftir. Þess má geta að þar mætir liðið Breiðabliki.

Andoni Iraola hjá Bournemouth og Frank Lampard, goðsgön Chelsea og nú stjóri Coventry, hafa einnig komið upp í umræðunni.