Michael Owen, fyrrum leikmaður Liverpool, Manchester United og enska landsliðsins, lenti árið 2021 í miklu fjölmiðlahneyksli þegar upp komst um meint kynferðisleg samskipti hans og fyrrverandi raunveruleikasjónvarpsstjörnu, Rebecca Jane, á samfélagsmiðum á meðan hann var giftur. Breska blaðið Daily Star fer ítarlega yfir málið í dag.

Owen, sem varð heimsþekktur aðeins 18 ára gamall á HM 1998 og vann Gullknöttinn árið 2001, hafði um árabil verið talinn fyrirmyndar fjölskyldumaður. Hann hefur verið giftur æskuástinni Louise Bonsall síðan 2005 og eiga þau fjögur börn saman.

Samkvæmt umfjöllun enskra blaða hafði Owen samband við Jane í gegnum samfélagsmiðla vorið 2021. Hún varð landsþekkt eftir þátttöku í Big Brother árið 2017. Í kjölfarið þróuðust samskiptin yfir í skilaboð sem voru sögð kynferðislegs eðlis, þar sem Owen átti meðal annars að hafa beðið um fjölmargar nektarmyndir.

„Sendu bara nektarmyndir, þetta er löng og leiðinleg ferð til London, ég þarf eitthvað að gera,“ á til að mynda að hafa staðið í einum skilaboðum Owen til Jane.

Owen á jafnframt að hafa lagt til að þau hittust á hestakappreiðum í Doncaster, en af því varð aldrei. Jane hélt því síðar fram að Owen hefði sagt henni að hjónabandi hans væri í raun lokið og aðeins til málamynda.

„Hann sagði mér að þetta væri hjónaband af hentisemi. Ég trúði honum,“ sagði hún árið 2022.

Owen viðurkenndi árið 2014 að hjónabandið hafi staðið á brauðfótum en sagði síðar að hjónabandsráðgjöf hefði bjargað því. Hann hefur aldrei tjáð sig opinberlega um ásakanirnar.

Málið hafði veruleg áhrif á ímynd Owen, sem í dag starfar sem sparkspekingur hjá TNT Sports og Amazon Prime.