Kjartan Henry Finnbogason var gestur Helga Fannars Sigurðssonar í Íþróttavikunni, vikulegum sjónvarpsþætti á 433.is.

Það var meðal annars rætt um karlalandsliðið í þættinum, en Kjartan er nýkominn heim úr vinnuferð, þar sem hann fjallaði um liðið fyrir Sýn.

Ísland byrjaði á því að vinna Aserbaísjan í Bakú en tapaði svo gegn Úkraínu í Varsjá, sem þýðir að liðið fer því miður ekki á HM næsta sumar.

Kjartan var spurður út í lífið utan vallar í borgunum og fannst honum ekki mikið til Bakú koma.

„Hún var skelfileg, ég er ekki aðdáandi. Svakaleg mengun, eldar út um allt. Það var mökkur eins og það væri þoka en það var bara brennisteinssýra,“ sagði Kjartan, en mikil olíuvinnsla er í Bakú.

„Þetta er annar menningarheimur en maður er vanur. Í leigubílnum á leið upp á flugvöll var ég mjög feginn að vera að komast í burtu. Mér fannst ég hafa misst svona 2-3 af lífi mínu á að hafa verið þarna,“ sagði hann enn fremur og hló.

„En ég var mjög hrifinn af Varsjá og Póllandi, það er hægt að mæla með því að fara þangað.“

Umræðan í heild er í spilaranum.