Í umfjöllun breska ríkisútvarpsins, BBC, kemur fram að enn sé margt á huldu um hvað samkomulagið felur í sér.
Heimildir miðilsins herma þó að hátt í 2.000 Palestínumönnum sem eru í haldi í Ísrael verði sleppt úr haldi. Þá verði 400 flutningabílum með hjálpargögn hleypt inn á Gaza-svæðið á degi hverjum og þeim muni fjölga á síðari stigum. Þá segir Hvíta húsið að Hamas muni sleppa 20 gíslum sem enn eru á lífi úr haldi.
Lyce Doucet, fréttamaður BBC, bendir á að þó að þetta sé stórt skref sé þetta aðeins byrjunin. Um sé að ræða vopnahlé og aðeins fyrsta skrefið í átt að friðarsamkomulagi.
Hvað hafa helstu aðilar sagt?
„Þetta er frábær dagur fyrir Ísrael,“ sagði Benjamin Netanyahu, forsætisráðherra Ísraels, í yfirlýsingu. Hann þakkaði ísraelskum hermönnum og Donald Trump, forseta Bandaríkjanna, og teymi hans fyrir að hafa tekið höndum saman í því verkefni að leysa gíslana úr haldi. „Með hjálp Guðs munum við koma þeim öllum heim,“ bætti hann við.
Donald Trump Bandaríkjaforseti skrifaði í yfirlýsingu á Truth Social í gærkvöldi:
„Þetta er FRÁBÆR dagur fyrir arabíska og múslimska heiminn, Ísrael, öll nágrannaríki og Bandaríkin, og við þökkum milligöngumönnum frá Katar, Egyptalandi og Tyrklandi sem unnu með okkur að því að gera þennan sögulega og fordæmalausa atburð að veruleika. SÆLIR ERU FRIÐARGJAFARNIR!“
Síðar sagði hann við Fox News að Gasa-svæðið verði endurbyggt eftir að fyrsti áfangi samningsins verður innleiddur. Bætti hann við að Gasa-svæðið verði miklu öruggari staður í kjölfarið.
Fulltrúar Hamas segja að samkomulagið muni „binda enda á stríðið á Gasa, tryggja brottför hernámsliðanna, leyfa innflutning mannúðaraðstoðar og fela í sér fangaskipti“.
„Fólkið á Gasa hefur sýnt óviðjafnanlegt hugrekki,“ sagði í yfirlýsingu.
„Við munum aldrei yfirgefa þjóð okkar né þjóðleg réttindi hennar fyrr en frelsi, sjálfstæði og sjálfsákvörðunarréttur er tryggður,“ bættu samtökin við.
