Ólafur Stephensen, framkvæmdastjóri Félags atvinnurekenda, er gáttaður á þögn Sjálfstæðismanna eftir umdeildan Kastljósþátt sem Snorri Másson, þingmaður Miðflokksins, hefur verið harðlega gagnrýndur fyrir. Bendir hann á að eini kjörni fulltrúi flokksins sem hafi tjáð sig um málið hafi ákveðið að verja Snorra.

Í færslu á samfélagsmiðlum vísar Ólafur í stefnu Sjálfstæðisflokksins um jafnrétti, mannréttindi og hinsegin málefni. En þar segir:

„Sjálfstæðisflokkurinn vill áfram vera í fararbroddi þeirra sem vilja tryggja mannréttindi og auka réttindi hinsegin fólks […] Ísland er, og á ávallt að vera, í fararbroddi þegar kemur að réttindum hinsegin fólks. Fólki á að vera frjálst að skilgreina kyn sitt að vild.“

„Góð stefna,“ segir Ólafur. „Þegar þingmaður Miðflokksins mætti í Kastljós til að treysta stöðu flokks síns sem deildar Þjóðminjasafnins með minjum um úrelt sjónarmið, fordóma og kallakalla síðustu aldar, var dauðafæri fyrir Sjálfstæðisflokkinn að minna á stefnu sína, standa með mannréttindum og aðgreina sig frá Miðflokknum.“

Bendir hann á að þessir tveir flokkar keppi um fylgi.

„En eini kjörni fulltrúi Sjálfstæðisflokksins sem datt í hug að segja eitthvað var Rósa Guðbjartsdóttir alþingismaður, sem fannst Snorri Másson sjálfur beittur hatursorðræðu og margir hafa gerzt grófir í hans garð í ummælum eftir þáttinn,“ segir Ólafur. Ekkert hafi komið fram um afstöðu Sjálfstæðismanna um það sem hann hafði að segja.

„Ég viðurkenni að ég skil þetta ekki – stefnan er þarna, af hverju talar enginn kjörinn fulltrúi fyrir henni og tekur upp málstað hinsegin- og transfólks? Af hverju þessi þögn?“ spyr Ólafur. „Getur það verið af því að þau meti það sem svo að hópurinn sem er sammála Snorra sé svo stór að það sé bezt að vera ekkert að styggja hann með einhverju tuði um mannréttindi? Þegar Sjálfstæðisflokkurinn var leiðandi afl í íslenzkri pólitík hafði hann um tíma kjörorðið „Gjör rétt, þol ei órétt“. Það mætti rifja það upp.“