Ásgerður Jóna Flosadóttir, formaður Fjölskylduhjálpar Íslands, er ómyrk í máli í garð stjórnvalda og segir að þeim virðist vera alveg sama um þá sem þurft hafa að leita eftir aðstoð samtakanna. Ásgerður er í viðtali í Morgunblaðinu í dag þar sem þetta kemur fram.

Eins og greint var frá í vor sótti Fjölskylduhjálpin ekki um styrk til ríkisins á síðasta ári og virðast mistök hafa orðið til þess. Taldi Ásgerður sig hafa sótt um styrkinn í samtölum við Ingu Sæland velferðarráðherra en svo var ekki.

Í samtali við Morgunblaðið bendir Ásgerður Jóna á að endurnýja þurfi tæki, meðal annars vegna krafna Heilbrigðiseftirlits Reykjavíkur, og aðeins sé um tvennt að velja. Annað hvort steypa sér í skuldir eða loka. Matarbanka Fjölskylduhjálparinnar var lokað í júlí og til stendur að losa húsnæði Fjölskylduhjálparinnar í Iðufelli þann 1. október næstkomandi.

Ásgerður segir við blaðið að neyðin sé enn mikil á Íslandi.

Ásgerður seg­ir að Fjöl­skyldu­hjálp­in hafi tekið á móti 1.900 vöru­brett­um af mat á síðasta ári og af­hent 800 fjöl­skyld­um mat­ar­gjaf­ir í hverri viku.

„Það rign­ir yfir mig tölvupóstum frá fólki sem sér fram á að eiga ekki fyr­ir mat, eft­ir að við hætt­um með mat­ar­gjaf­irn­ar. Það er eins og ráðamönn­um sé sama um af­leiðing­arn­ar og mat­ur­inn end­ar í urðun hjá Sorpu.“

Nánar er fjallað um málið í Morgunblaðinu í dag.