Maður nokkur vekur athygli, í færslu í Facebook-hópnum Vertu á verði-Eftirlit með verðlagi, á verði fyrir gistingu á hóteli á Suðausturlandi. Fram kemur á skjáskoti sem maðurinn birtir af bókunarsíðu að gisting í tveggja manna herbergi í tvær nætur kosti 205.567 krónur. Vekur verðið nokkra reiði meðal þeirra sem rita athugasemdir við færslu mannsins.
Maðurinn segist hafa kannað verð fyrir gistingu nú í komandi ágústmánuði. Ekki kemur fram í færslunni hvaða dagsetningar í ágúst hann kannaði en líklega er það fyrri hluta mánaðarins þar sem kemur fram að aðeins sé 1 herbergi laust.
Um er að ræða fjögurra stjörnu hótel og umrædd herbergi kallast Deluxe. Samkvæmt heimasíðu hótelsins er morgunverður innifalinn og inn á herbergjunum eru baðhergi, sjónvörp og innifalin eru einnig aðgangskort í sundlaug og líkamsræktarstöð í 200 metra fjarlægð frá hótelinu, nettenging, tesett, Nespresso kaffi, baðvörur og hárblásari.
Verðið vekur nokkra reiði í athugasemdum:
„Meira ruglið!!!“
„Þetta er orðin ógeðsleg menning! Getur ekki sagt mér að þau séu að borga svooo há laun til þess að réttlæta þetta verð og það sé svo rosalega erfitt að reka þennan stað. Vonandi hætta ferðamenn að koma hingað svo að þeir læri á þessu!“
„Þetta er ekki gott fyrir landið okkar þetta er orðið viðbjóður.“
Í einni athugasemd er hins vegar bent á að málið sé mögulega ekki svona einfalt:
„Þetta er væntanlega af Booking sölusíðunni. Kerfið hjá þeim er þannig að ef þeir hafa ekki fleiri herbergi til umboðssölu á viðkomandi hóteli þá er þetta gert, að bjóða uppá herbergi á óheyrilega háu verði sem enginn myndi tæplega taka á leigu.“
DV gerði lauslega könnun á verði fyrir gistingu fyrir tvo fullorðna á umræddu hóteli í tveggja manna deluxe herbergjum í tvær nætur. Verðið daganna 21.-23. ágúst næstkomandi var kannað. Lægsta verðið á bókunarsíðunni Booking.com var 139.610 krónur. Á heimasíðu hótelsins sjálfs eru gefin upp tvö verð á gistingu í þessum herbergjum á umræddu tímabili. Annars vegar 181.932 krónur en hins vegar 163.738 krónur en við síðarnefnda verðið er tekið fram að ekki sé hægt að fá endurgreitt.
