Samkvæmt tilkynningu frá Reykjavíkurborg er gosmóða frá eldgosinu við það að ná til höfuðborgarsvæðisins. Gosmóða inniheldur mengun sem hefur náð að umbreytast meðal annars í súlfat og brennisteinssýru. Þessi mengun greinist ekki með hefðbundnum mælingum á brennisteinsdíoxíði en mælingar á fínu svifryki gefa vísbendingar um að þessi mengun sé til staðar. Gildi fínasta svifryksins eru farin að hækka á mælistöðvum í Kópavogi og má gera ráð fyrir að gosmóðan sé á leið yfir borgina.

Í tilkynningu segir:

„Gosmóða getur orsakað slen, höfuðverk, ertingu í augum og hálsi auk flensueinkenna. Þeir sem eru viðkvæmir fyrir í öndunarfærum, og börn ættu að forðast útivist í lengri tíma og takmarka áreynslu. Þeir sem eru síður viðkvæmir geta einnig fundið fyrir einkennum. Ekki er mælt með því að láta ung börn sofa úti í vagni við þessar aðstæður.

Almennar ráðleggingar varðandi gasmengun eru eftirfarandi:

• Lungna og hjartasjúklingar hafi sín lyf tiltæk.
• Andið sem mest með nefi og forðast líkamlega áreynslu utandyra í mikill mengun því það dregur úr þeim styrk sem kemst niður í lungu.
• Dvöl innanhúss með lokaða glugga og slökkt á loftræstingu veitir verulega vörn fyrir menguninni.
• Athugið að rykgrímur veita enga vörn gegn gasmengun.
• Ráðstafanir til varnar SO2 og annarri gosmengun mengun innandyra:
  • Lokaðu gluggum og minnkaðu umgengni um útidyr.
  • Hækkaðu hitastigið í húsinu.
  • Loftaðu út um leið og loftgæði batna utandyra.“