Agla María Albertsdóttir ræddi við 433.is í kvöld eftir leik við Finnland á EM kvenna sem fer fram í Sviss.

Ísland tapaði opnunarleiknum 1-0 en spilaði manni færri rúman hálftíma sem gerði verkefnið erfitt fyrir stelpurnar.

,,Það var ekki eitthvað eitt móment þar sem þetta fór úrskeiðis hjá okkur. Við vorum ólíkar okkur stóran hluta leiksins og vorum ekki að þora að gera nógu mikið,“ sagði Agla.

,,Þetta er jafn leikur til að byrja með, fyrsti leikurinn á mótinu og við erum að mæta þéttu liði Finna. Þetta er oft svona í byrjun leikja en svo byrjaði þetta að opnast þegar leið á leikinn.“

,,Ég var steinhissa þegar ég sá að hún væri komin með rautt spjald, ég skildi ekkert í þessu. Ég hef ekki séð þetta aftur en mér skilst að þetta hafi ekki verið rautt spjald,“ sagði Agla um rauða spjaldið sem Ísland fékk en Hildur Antonsdóttir var rekin af velli með tvö gul spjöld.