Helgi Fannar Sigurðsson skrifar frá Sviss

Ísland hefur leik á EM gegn Finnlandi nú klukkan 16 að íslenskum tíma. Í Thun, þar sem leikurinn fer fram, er mikil stemning. Hitti undirritaður sparkspekinginn Mist Rúnarsdóttur og tók stutt spjall um leikinn.

„Ég er ógeðslega stressuð og ógeðslega spennt. Ég ætla bara að vera bjartsýn. Það hlýtur að vera komið að næsta sigri á EM, það er langt síðan síðast. En taugarnar eru þandar,“ sagði Mist.

Ísland hefur aðeins einu sinni unnið leik á stórmóti, EM 2013. Riðillinn nú, sem inniheldur Noreg og Sviss auk Finna, þykir vel viðráðanlegur.

„Það er mikið búið að tala um þennan riðil og möguleika Íslands, en við megum ekki gleyma því að við erum í lokakeppni Evrópumóts og það eru engir auðveldir leikir. Það er svolítið stress að byrja á þessum leik því við þurfum að þora í þessum leik.“

Mist benti á að það sé oft stutt á milli í fótboltanum, eins og á EM fyrir þremur árum. Þá gerðu Stelpurnar okkar þrjú jafntefli og duttu úr leik þrátt fyrir fína frammistöðu.

„Ég er alltaf bjartsýn. Miði er möguleiki. En eins og við sáum á síðasta móti er þetta bara stöngin inn, stöngin út. Við erum svo oft búin að vera nálægt því að ég ætla að vera bjartsýn á að þetta takist núna.“

Það er sem fyrr segir svakaleg stemning meðal Íslendinga í Sviss.

„Þetta er eins og að koma á ættarmót. Þetta er oft sama fólkið og geggjuð stemning. Íslenski stuðningsmannahópurinn er ekki alltaf stærstur en hann er háværastur og öflugastur,“ sagði Mist að endingu, en viðtalið í heild er í spilaranum.