Ástæðan er sú að karlkyns viðskiptavinir stofunnar hafa ítrekað sýnt af sér óviðeigandi hegðun. Eftir að hafa fundað með samstarfskonum sínum á nuddstofunni var sú ákvörðun tekin að hér eftir verði einungis konur og trans konur afgreiddar.
News.com.au fjallar um þetta.
Kessley segir að í síðustu viku hafi tvær samstarfskonur hennar haft orð á því hversu margar óviðeigandi fyrirspurnir komu frá körlum í gegnum vefsíðu nuddstofunnar. Þar voru karlar að spyrja hvort þeir mættu vera naktir á nuddbekknum og hvort boðið væri upp á svokallað sensual-nudd þar sem áhersla er lögð á nána og kynferðislega örvandi snertingu.
„Þær sögðu mér síðan hvað þær höfðu upplifað í nuddherbergjunum og þá var mér brugðið” segir Kessley og bætir við að báðar höfðu upplifað ýmislegt óþægilegt í störfum sínum. Óþægilegar athugasemdir til dæmis, jafnvel kynferðislegt tal eða stunur.
„Á þessu augnabliki hugsaði ég með mér að ég yrði að grípa til aðgerða. Öryggi starfsfólks míns er í fyrsta sæti og það á engum að líða óþægilega í vinnunni,“ segir hún.
Eftir að nuddstofan deildi þessum breytingum á Instagram-síðu sinni segir Kessley að viðbrögðin hafi almennt verið góð og þá sérstaklega frá konum.
