Það er óhætt að segja að Alejandro Garnacho, leikmaður Manchester United, sé ekki að gera neitt til að reyna að bæta samband sitt við stuðningsmenn félagsins þessa dagana, þvert á móti.

Garnacho má fara frá United í sumar, en hann er alls ekki inni í myndinni hjá Ruben Amorim á Old Trafford. Hann hefur til að mynda verið orðaður við Chelsea og Napoli.

En sem stendur nýtur Argentínumaðurinn sumarfrísins og hefur ferðast til bæði Rómar og Tókýó í sumar. Nú er hann hins vegar staddur á Ibiza og þaðan birti hann af sér umdeilda mynd sem hefur ekki fallið vel í kramið hjá stuðningsmönnum United.

Garnacho er nefnilega klæddur treyju Aston Villa á myndinni, með nafni Marcus Rashford aftan á. Það er auðvitað annar leikmaður sem er úti í kuldanum hjá United, en hann var á láni hjá Villa seinni hluta síðustu leiktíðar.

„Farðu burt frá félaginu okkar,“ var til að mynda skrifað við myndina og fleira í þeim dúr.