Ef marka má helstu sparkspekinga virðist Jóhannes Karl Guðjónsson vera að taka við karlaliði ÍA á nýjan leik. Ekki eru allir sannfærðir um þessa yfirvofandi ráðningu.

Fyrr í vikunni var tilkynnt að Jón Þór Hauksson og knattspyrnudeild ÍA hefðu slitið samstarfi sínu eftir dapurt gengi það sem af er móti í Bestu deildinni. Skagamenn eru á botninum með níu stig.

Jóhannes er þjálfari AB Kaupmannahafnar í dönsku C-deildinni en háværir orðrómar eru um að hann sé að koma heim og taka við ÍA.

„Mér finnst hann fljótur að gefast upp úti. Hann endaði tímabilið vel og var að fá íslenskan markmann,“ sagði Kristján Óli Sigurðsson um málið í Þungavigtinni, og á þar við Adam Inga Benediktsson sem er mættur til AB frá Öster.

Kristján sagði jafnframt að Skagamenn ættu að hans mati að horfa í mann eins og Gunnar Heiðar Þorvaldsson, sem er að gera frábæra hluti með Njarðvík, en Jóhannes.

„Það sem ég er mest hissa á er samt að Skagamenn fari í þessa átt. Jóhannes Karl var búinn á Skaganum áður en KSÍ bjargaði þeim frá því að þurfa að reka hann. Ég hefði frekar farið í Gunnar Heiðar. Verðmiðinn hjá Njarðvíkingum er 5,5 milljónir.“

Jóhannes Karl stýrði ÍA einnig frá 2018 til 2021, áður en hann gerðist aðstoðarþjálfari íslenska karlalandsliðsins, þaðan sem hann hélt svo til Danmerkur.