Mason Greenwood er staddur í Manchester um þessar mundir, þar sem hann heldur sér í standi í sumarfríinu.

Enski sóknarmaðurinn átti frábært tímabil með Marseille í Frakklandi, þangað sem hann kom í fyrra. Skoraði hann 22 mörk og lagði upp 6 í 36 leikjum.

Hefur hann verið orðaður við brottför og talið að lið á Englandi, Spáni, Ítalíu og Sádi-Arabíu hafi áhuga.

Greenwood æfði ekki einn þegar ljósmyndarar komu auga á hann heldur var hann með fyrrum liðsfélaga sínum úr yngri liðum Manchester United, D’Mani Mellor.

Mellor á að baki einn leik fyrir aðallið United í Evrópudeildinni 2019. Hann yfirgaf Old Trafford 2022 og fór til Wycombe, en í dag spilar hann með Macclesfield.