Þorsteinn Halldórsson, landsliðsþjálfari kvennalandsliðs Íslands, ræddi við RÚV í kvöld eftir tap stelpnanna gegn Frökkum í Þjóðadeildinni.
Leiknum lauk með 2-0 sigri Frakka sem þýðir það að Ísland endar riðlakeppnina án sigurs og gerði fjögur jafntefli ásamt því að tapa tveimur.
,,Við byrjuðum illa, féllum af þeim og þorðum ekki að stíga upp en svo unnum við okkur ágætlega inn í fyrri hálfleikinn og ljúkum honum vel,“ sagði Þorsteinn.
,,Við náðum að skapa færi undir lok hálfleiksins en við vorum svolítið off með boltann, fyrsta snerting og svoleiðis. Í seinni hálfleik var vandamálið það að við vorum ekki að taka boltann niður og vorum að flýta okkur of mikið á köflum.“
Þorsteinn var svo spurður út í það hvort það hefðu verið mistök að byrja ekki með Söndru Maríu Jessen í leiknum en hún kom inná sem varamaður í seinni hálfleik.
,,Já eflaust, það er hægt að skoða það allt saman en það er bara eins og það er og maður tekur ákvarðanir og stendur og fellur með þeim.“
,,Það eru leikir í keppninni sem við áttum að vinna frekar en að gera jafntefli en þetta er niðurstaðan og við þurfum að fara í umspil í haust og vinna það.“
