Verktaki var nýlega fenginn til að fjarlægja nokkur tré á landareign bónda eins á Mið-Jótlandi í Danmörku. En óhætt er að segja að verktakinn og bóndinn, hafi ekki trúað eigin augum, þegar peningar í miklu magni byrjuðu að velta upp úr jörðinni við uppgröftinn.

Skive Folkeblad segir að um margar milljónir danskra króna sé að ræða og aðrir danskir fjölmiðlar hafa nefnt töluna sjö milljónir en það svarar til 140 milljóna íslenskra króna.

Málið er allt hið dularfyllsta og lögreglan er að rannsaka það. Talsmaður hennar ræddi við TV MIDTVEST og staðfesti að peningar hefðu fundist við uppgröft á landareigninni og sagði að um „töluverða upphæð“ sé að ræða. Hann vildi ekki skýra frá upphæðinni vegna rannsóknarhagsmuna.

Aðspurður sagðist hann ekki vilja segja neitt um samsetningu seðlanna því ef einhver gefi sig fram og segist eiga þá, þá þurfi viðkomandi að geta skýrt nákvæmlega frá upphæðinni og samsetningunni.