Foxx veiktist með undarlegum hætti í apríl 2023. Í júlí sama ár sagðist hann hafa farið til „helvítis og til baka.“
„Ég gekk í gegnum eitthvað sem ég hélt að ég myndi aldrei, aldrei ganga í gegnum.“
Í desember 2023 sagði hann á verðlaunahátíð: „Þetta er brjálað, ég hefði ekki getað gert þetta fyrir sex mánuðum, ég gat í rauninni ekki gengið. Ég er ekki klón, ég er ekki klón. Ég þekki fullt af fólki sem segir að ég hafi verið klónaður. Ég vil þakka öllum. Ég hef gengið í gegnum margt. Mér þykir vænt um hverja einustu mínútu núna, ég nýti þær öðruvísi. Ég myndi ekki óska mínum versta óvini því sem ég gekk í gegnum því það er erfitt þegar þetta er næstum búið, þegar þú sérð göngin. Ég sá göngin, ég sá ekki ljósið. Ég ber nýja virðingu fyrir lífinu. Ég ber nýja virðingu fyrir list minni. Ég horfði á svo margar kvikmyndir og hlustaði á svo mörg lög til að reyna að láta tímann líða. Ekki gefast upp á listinni, ekki gefast upp.“
Veikindi Foxx voru álitin mjög dularfull, þar sem leikarinn greindi ekki frá orsök þeirra. Alls konar kenningar voru á sveimi, meðal annars að Diddy hafi reynt að drepa hann. En í desember 2024 greindi leikarinn frá því að hann hafði fengið heilablæðingu sem leiddi til heilablóðfalls.
Jamie Foxx tjáði sig loksins um þessa villtu samsæriskenningu í myndbandi fyrir Hollywood Reporter sem fór í loftið í gær. Um tímann sinn á sjúkrahúsinu sagði hann:
„Ég stalst í símann því ég vissi ekki hvað allir þarna úti voru að segja um mig og ég var ekki alveg að meðtaka þá staðreynd að ég hafi fengið heilablóðfall. Ég er í geggjuðu formi. [Ég sá hluti eins og að Diddy] reyndi að drepa mig. Nei hann reyndi ekki að drepa mig.“
Það var önnur samsæriskenning sem fór meira í taugarnar á honum.
„Þegar þeir sögðu að ég væri klón, það gerði mig brjálaðan. Ég lá í sjúkrahúsrúminu bara: „Þessir bjánar eru að reyna að klóna mig,““ sagði hann í gríni.
Réttarhöld yfir Diddy standa nú yfir. Hann er ákærður fyrir skipulagða glæpastarfsemi og kynferðislegt mansal.
