Ein þekktasta kona heims, raunveruleikaþáttastjarnan Kim Kardashian, fagnaði því í gær að vera loksins útskrifuð með lögfræðigráðu eftir sex ára nám. 

„Þið hafið öll verið á þessu ferðalagi með mér,“ sagði Kim í ræðu í einka útskriftarathöfn umkringd vinum og vandamönnum. 

Kim sem er 44 ára segir að áhugi hennar á að læra lögfræði hafi kviknað þegar henni fannst hún nautheimsk eftir áhorf á myndband á Twitter. Árið 2019 greindi hún frá því að hún hefði hafið lögfræðinám, hún féll þrisvar á svokölluðu baby bar prófi áður en hún náði því árið 2021. Í viðtali árið 2022 sagði Kim að hana dreymdi um það að opna lögfræðistofu einn daginn.

Einn kennara hennar segir námsferil Kim hafa verið hvetjandi. 

„Fyrir sex árum gekk Kim inn í námið með ekkert nema brennandi áhuga á að berjast fyrir réttlæti. Engir lagaskólafyrirlestrar, engin forréttindi, bara ákveðni.“  Segir kennarinn Kim hafa varið 18 klukkustundum, 48 vikur á ári í sex ár í námið. „Það eru 5184 klukkutímar af lögfræðinámi. Tími sem Kim nýtti til að læra auk þess að ala upp fjögur börn, reka fyrirtæki, taka upp sjónvarpsþætti og mæta í dómssal til að reka hagsmuni annarra.“

Fjölskylda Kim skipulagði veisluna, en sjálf hélt hún að um væri að ræða hefðbundinn brunch með fjölskyldunni. 

Kim getur næst tekið lögfræðipróf (e. Bar exam) sem gerir henni kleift að starfa sem lögmaður í Kaliforníu.