Ruben Amorim sagði eftir tap Manchester United gegn Tottenham í gær að hann væri til í að ganga burt úr stjórastarfinu án þess að fá meira greitt frá félaginu, yrði þess óskað.
Liðin mættust í úrslitaleik Evrópudeildarinnar í gær. United er í 16. sæti ensku úrvalsdeildarinnar og eftir gærdaginn er ljóst að liðið leikur ekki í Evrópukeppni á næstu leiktíð.
Amorim tók við sem stjóri United af Erik ten Hag í haust en hefur ekki tekist að snúa ömurlegu gengi liðsins við. „Ef fólkinu á bak við tjöldin og stuðningsmönnum finnst ég ekki vera rétti maðurinn mun ég fara án þess að biðja um að fá krónu greidda,“ sagði Amorim eftir leik í gær.
„En ég mun ekki segja upp því ég hef mikla trú á mér í þessu starfi og mun ekki breyta því hvernig ég geri hlutina.“
Breska blaðið The Sun hefur nú tekið saman lista yfir sex menn sem gætu tekið við sem næsti stjóri United ef Amorim fer.
Max Allegri, fyrrum stjóri Juventus, er þar efstur á blaði, en samkvæmt veðbönkum þykir hann líklegastur. Hann hefur verið án starfs síðan í fyrra, en hann á að baki frábær ár hjá Juventus.
Kieran McKenna, stjóri Ipswich, er einnig nefndur til sögunnar. Þykir hann spennandi þjálfari þó svo að nýliðarnir séu fallnir úr ensku úrvalsdeildinni undir hans stjórn. Tók hann Ipswich upp úr ensku C-deildinni og í úrvalsdeild á tveimur árum.
Jose Mourinho er einnig á listanum. Hann hefur auðvitað áður verið stjóri United og þarf ekki að kynna hann fyrir knattspyrnuaðdáendum.
Mauricio Pochettino hefur fyrr á ferlinum verið orðaður við United og heldur það áfram nú. Er hann fjórði líklegasti til að taka við samkvæmt veðbönkum. Pochettino er í dag landsliðsþjálfari Bandaríkjanna en hann hefur áður stýrt liðum eins og Tottenham og Chelsea.
Loks er Gareth Southgate á blaði. Hann er enn án starfs eftir að hafa hætt sem landsliðsþjálfari Englands í fyrra.
