Forráðamenn sádiarabísku deildarinnar eru stórhuga fyrir sumarið og má búast við því að enn fleiri stórstjörnur mæti í deildina. Sky Sports fjallar um málið.

Það vakti mikla athygli sumarið 2023 þegar félög í deildinni sönkuðu að sér stórum nöfnum. Má þar nefna Neymar og Karim Benzema, en Cristiano Ronaldo kom í deildina nokkrum mánuðum fyrr.

Þetta sumar eyddu félög í deildinni yfir 700 milljónum punda. Dróst þessi eyðsla mikið saman í fyrra, eða um 50 prósent, og var meiri áhersla sett á að sækja unga leikmenn.

Í sumar má þó gera ráð fyrir að deildin sæki ansi stór nöfn og eru Bruno Fernandes, Jack Grealish og Victor Osimhen á meðal nafna á blaði.

Í bland verður lögð áhersla á að semja við virkilega spennandi unga leikmenn, eins og gert var með því að ná í Jhon Duran til Al-Nassr í janúarglugganum.

Félög í deildinni hafa þó einnig fengið að vita að þau hafi ekki ótakmarkað fjármagn milli handanna og að þau þurfi að reka sig eins og góð fyrirtæki. Því fylgir að selja leikmenn einnig og þess háttar.