Ruben Amorim, þjálfari Sporting, viðurkennir að það væri í raun ómögulegt fyrir félagið að semja aftur við Cristiano Ronaldo.

Ronaldo hefur verið orðaður við endurkomu til Portúgals en hann vakti fyrst heimsathygli sem leikmaður Sporting.

Ronaldo er í dag 37 ára gamall og spilar með Manchester United en er ekki inni í myndinni hjá Erik ten Hag, stjóra liðsins.

Amorim telur að Ronaldo sé ekki á leið aftur til Sporting enda er launapakki hans ekki eitthvað sem öll félög ráða við.

,,Ronaldo er toppleikmaður, hann er leikmaður Manchester United. Ég mun svara alveg eins og ég svara mörgum blaðamönnum í Portúgal. Hann er leikmaður Manchester United,“ sagði Amorim.

,,Allir hjá Sporting eru með draum varðandi endurkomu Ronaldo en við erum ekki með peningana til að borga launin hans. Ég held að hann sé ánægður í Manchester en fær ekki að spila þessa dagana sem er vandamál.“