„Ég er bara mjög sáttur, þetta var góður sigur í kvöld á móti lakari andstæðingi en við stóðumst prófið vel í kvöld fannst mér,“ sagði Freyr Alexandersson, þjálfari íslenska landsliðsins eftir 8-0 sigur liðsins á Færeyjum í kvöld.

Það voru þær Elín Metta Jensen, Gunnhildur Yrsa Sigurðardóttir, Sara Björk Gunnarsdóttir, Fanndís Friðriksdóttir og Berglind Björg Þorvaldsdóttir sem skoruðu mörk Íslands í leiknum.

„Ég bað stelpurnar um að spila ákveðnar leiðir sóknarlega og mér fannst við gera það vel. Varnarlega var planið bara að ráðast á þær um leið og við töpuðum honum og pressa þær í kaf. Þjálfari Færeyja sagði við mig að þær hefðu aldrei lent í öðru eins. Auðvitað hafa þær ekki sömu færni og önnur lið en þetta var gert vel hjá okkur fannst mér.“

„Ég ætla að velja vel hluti sem við getum nýtt okkur eftir þennan leik og það sem ég ætla að gera núna er að fara yfir það sem við gerðum. Ef við náum stigi út í Þýskalandi þá væri það hrikalega vel gert. Draumurinn er að vera með örlögin í okkar höndum.“

Viðtalið í heild sinni má sjá hér fyrir ofan og neðan.