Lögregla í Bretlandi hefur hafið rannsókn eftir að fjórir leikmenn í ensku úrvalsdeildinni urðu fyrir kynþáttaníði.

Hannibal Mejbri hjá Burnley, Wesley Fofana hjá Chelsea, Tolu Arokodare hjá Wolves og Romaine Mundle hjá Sunderland, urðu fyrir kynþáttaníði á samfélagsmiðlum á meðan umferðinni um helgina stóð.

Lögregla segir að nokkrar aðskildar rannsóknir séu í gangi og að unnið verði með félögum og yfirvöldum til að bera kennsl á gerendur, en samtökin Kick It Out lýsa helginni sem skelfilegri í samhengi við kynþáttaníð.

Það er því miður allt of algengt að mál er varða kynþáttaníð komi upp í tengslum við enska boltann, sem og fótboltann víðar. Þetta tímabil hefur ekki verið nein undantekning.