Kærasta enska úrvalsdeildarleikmannsins Aaron Wan-Bissaka stendur frammi fyrir mögulegri fangelsisrefsingu verði hún fundin sek. April Francis, 27 ára, er ákærð fyrir að hafa ekið á gangandi vegfaranda í september síðastliðnum, sem leiddi til alvarlegra og varanlegra meiðsla.

Atvikið átti sér stað í Brentwood í Essex og er talið að Wan-Bissaka, sem leikur með West Ham, hafi ekki verið viðstaddur þegar slysið varð. Francis, sem hefur verið í sambandi við knattspyrnumanninn síðan 2020 og er móðir barns þeirra, hefur verið ákærð fyrir að valda alvarlegum meiðslum með hættulegum akstri.

Um er að ræða eitt alvarlegasta umferðarlagabrot sem hægt er að ákæra fyrir í Bretlandi og getur refsing við sakfellingu orðið allt að fimm ára fangelsi. Francis á að mæta fyrir dóm í Colchester-dómstólnum í Essex þann 17. febrúar.

Wan-Bissaka, lék með West Ham í gær í 3-1 sigri gegn Sunderland. Hann hóf feril sinn hjá Crystal Palace áður en hann lék 130 leiki fyrir Manchester United. Á síðasta ári skipti hann einnig um landslið og leikur nú fyrir Lýðveldið Kongó eftir að hafa áður leikið fyrir yngri landslið Englands.

Talsmaður Essex-lögreglunnar staðfesti að Francis hefði verið ákærð eftir að sönnunargögn málsins hefðu verið yfirfarin af lögreglu og saksóknara.