Suzy Cortez, fyrirsæta og einn harðasti stuðningsmaður Lionel Messi, hefur tjáð ást sína á nýrri knattspyrnustjörnu.

Cortez hefur um árabil verið þekkt fyrir mikla aðdáun á Messi og er með fjölda húðflúra honum til heiðurs, þar á meðal nafn hans, myndir og treyjunúmerið 10.

Cortez hefur þó gengið of langt á köflum og er talið að eiginkona Messi hafi látið banna henni að mæta á leiki á tímabili.

Messi er ekki að yngjast og er kominn til Inter Miami í Bandaríkjunum eins og flestir vita. Hann sló auðvitað í gegn hjá Barcelona og nú hefur Cortez tjáð ást sína á skærustu stjörnu liðsins í dag, Lamine Yamal.

„Það er nýtt upphaf hjá Barcelona. Tían er í frábærum höndum. Lamine Yamal er stærri en Vinicius Junior og Kylian Mbappe til samans,“ segir Cortez um þennan 18 ára gamla leikmann.