Josh Cavallo, fyrsti opinberlega samkynhneigði atvinnumaðurinn í knattspyrnu, hefur sakað fyrrverandi félag sitt, Adelaide United, um fordóma vegna kynhneigðar hans og segir að það hafi verið meginástæðan fyrir brottför hans frá félaginu.
Cavallo kom út í október 2021 og hlaut þá mikinn stuðning víða úr knattspyrnuheiminum. Hann var fyrsti leikmaðurinn til að koma út síðan Justin Fashanu gerði það árið 1990. Þrátt fyrir það segir Ástralinn að staða hans hjá Adelaide hafi versnað í kjölfarið.
Í færslu á Instagram sagði Cavallo að brottför hans hefði ekkert með fótbolta að gera. „Ákvarðanir voru teknar af fólki í valdastöðum sem komu í veg fyrir að ég fengi tækifæri, ekki vegna hæfileika minna heldur vegna þess hvern ég vel að elska,“ skrifaði hann.
Cavallo fullyrði að kynhneigð hans hafi haldið honum á varamannabekknum og jafnframt að hann viti til þess að samherjar hans hafi gert grín að honum og kærasta hans í hópspjalli á samfélagsmiðlum.
Cavallo lék ekki mínútu með liðinu tímabilið 2024-2025 og fór að lokum frá félaginu, fyrst til Peterborough Sports og síðar Stamford AFC. „Nýtt upphaf hefur gert mér kleift að anda á ný,“ segir hann.
Adelaide United hafnar ásökununum alfarið. Félagið segist ætla að halda áfram að skapa öruggt og opið umhverfi fyrir alla.
