Manchester United er að skoða Rafael Leão sem mögulega viðbót á vinstri vænginn í sumar samkvæmt ítölskum miðlum.

Leão, sem leikur með AC Milan, er sagður vera á lista United yfir möguleg skotmörk, þó að Morgan Rogers hjá Aston Villa sé enn fyrsti kostur félagsins til að styrkja sóknarlínuna.

Samkvæmt fréttunum gæti Leão hins vegar reynst mun ódýrari kostur, þar sem Milan er talið tilbúið að selja hann fyrir um 43 milljónir punda, verulega lægri upphæð en Aston Villa myndi fara fram á fyrir Rogers.

Leão á tvö ár eftir af samningi sínum við Milan og er talinn verðmætasta eign félagsins. Það gæti aukið líkurnar á sölu þar sem ítalska félagið undirbýr enduruppbyggingu á leikmannahópnum.

Í fréttunum kemur einnig fram að Joshua Zirkzee gæti vakið áhuga Milan sem hluti af hugsanlegri fléttu.

Leão hefur skorað níu deildarmörk á tímabilinu og lagt upp þrjú til viðbótar.