Burnley hefur áhuga á að ráða landsliðsþjálfara Wales, Craig Bellamy, sem næsta knattspyrnustjóra eftir að Scott Parker lét af störfum.

Bellamy er ofarlega á blaði félagsins yfir hugsanlega arftaka en talið er að það gæti reynst erfitt að fá hann frá velska landsliðinu. Kostar það sitt og ku hann ekki vera mjög spenntur yfir þeim leikmönnum sem Burnley hefur úr að ráða.

Hann starfaði áður hjá Burnley sem aðstoðarþjálfari undir stjórn Vincent Kompany og var meðal þeirra sem komu til greina þegar Parker var ráðinn árið 2024.

Einnig hafa Steven Gerrard og Brian Barry-Murphy verið orðaðir við starfið.

Aðstoðarþjálfarinn Michael Jackson stýrir liðinu út tímabilið.