Mikil óvissa ríkir í hollenskum fótbolta eftir að hollenska knattspyrnusambsandið varaði við því að tímabilið í Eredivisie gæti farið í uppnám vegna lagadeilu sem gæti haft gríðarleg áhrif á deildina.

NAC Breda hefur höfðað mál vegna 6-0 taps liðsins gegn Go Ahead Eagles í mars. Deilan snýst um að varnarmaðurinn Dean James hafi að sögn ekki verið löglegur leikmaður í leiknum.

Ástæðan er sú að James, sem er fæddur í Hollandi, hefur byrjað að spila fyrir indónesíska landsliðið og samkvæmt hollenskum lögum getur einstaklingur misst hollenskan ríkisborgararétt við að taka upp annað ríkisfang. Þá hefði hann þurft atvinnuleyfi til að spila í Hollandi.

NAC vill að leikurinn verði dæmdur ógildur og endurtekinn, en áfrýjunarnefnd knattspyrnusambandsins ákvað áður að niðurstaðan stæði.

Takist NAC að vinna málið gæti það haft fordæmisgildi fyrir fjölmarga aðra leiki á tímabilinu, með þeim afleiðingum að allt að 133 leikir í efstu deild gætu þurft að fara fram á ný.

Málið hefur vakið mikla athygli í hollenskum fótbolta og gæti haft sögulegar afleiðingar fyrir deildarkeppnina.