Spænski knattspyrnustjórinn Xabi Alonso er sagður opinn fyrir því að taka við Chelsea, en með einu skilyrði. Simon Phillips, blaðamaður sem fjallar mikið um málefni Chelsea, heldur þessu fram.

Chelsea leitar nú að nýjum knattspyrnustjóra í stað Liam Rosenior, sem var rekinn á dögunum eftir nokkra mánuði í starfi og fremur afleitt gengi. Hefur félagið rætt við nokkra kandídata.

Alonso gerði frábæra hluti með Bayer Leverkusen, en gekk síður vel í starfi hjá Real Madrid og var hann látinn fara þaðan. Hann er því á lausu.

Mikill óstöðugleiki hefur verið hjá Chelsea undanfarin ár í kjölfar þess að nýir eigendur komu inn í félagið.

Knattspyrnustjórarnir á þessum tíma hafa þá fengið takmörkuð völd en Alonso vill sjá það breytast, eigi hann að taka við, samkvæmt Phillips.

Fleiri hafa verið orðaðir við starfið, til að mynda Andoni Iraola, sem mun yfirgefa Bournemouth í sumar eftir að hafa skilað þar frábæru starfi.