Bandaríski rapparinn Snoop Dogg stal senunni á Swansea-leikvanginum í gær þegar hann mætti á sinn fyrsta leik hjá Swansea City eftir að hafa keypt minnihluta í félaginu í sumar.

Snoop Dogg fékk svakalegar móttökur frá stuðningsmönnum Swansea fyrir viðureign liðsins gegn Preston í ensku B-deildinni. Stuðningsmenn fengu afhent hvít handklæði merkt rapparanum sem þeir sveifluðu í takt þegar hann gekk inn á völlinn.

Hann gekk hring um völlinn með fylgdarliði sínu, gaf eiginhandaráritanir og stillti sér upp í myndatökur. Áhorfendur sungu þá með lögum hans.

Leiknum í gær lauk með 1-1 jafntefli. Swansea siglir nokkuð lignan sjó í deildinni, er í 14. sæti deildarinnar, 8 stigum frá umspilssætinum og 12 stigum fyrir ofan fallsvæðið.

Extraordinary scenes at Swansea as a record crowd greets co-owner Snoop Dogg on his first visit to stadium. pic.twitter.com/IoyYcGvHPJ

— Phil Blanche 🏴󠁧󠁢󠁷󠁬󠁳󠁿 (@philblanche) February 24, 2026