Gylfi Þór Sigurðsson virðist vera að finna taktinn í Víkingstreyjunni eftir fremur hæga byrjun eftir komu sína til félagsins.

Gylfi skoraði seinna mark Víkings í 0-2 sigri á KA í gær og átti flottan leik. Hann fékk einnig mikið lof fyrir frammistöðu sína gegn KR í síðasta leik.

„Gylfi fór í Víking til að vinna titil, hann sá að það var ekki séns á Hlíðarenda. Tók hann rétta ákvörðun?“ spurði Hjörvar Hafliðason í Dr. Football, en Víkingur er á toppi deildarinnar.

Andri Már Eggertsson, Nablinn, tók þá til máls.

„Já, heldur betur. Sérstaklega núna þegar ef hann er að verða meiri faktor í mörkum og stoðsendingum. Víkingarnir eru líklegir til að fara alla leið og þá líta félagaskiptin hjá Gylfa auðvitað mjög vel út.“

Gylfi fór eftirminnilega frá Val í Víking í vetur eftir eitt ár á Hlíðarenda. Ekki voru allir Valsarar sáttir við skiptin og úr varð mikið fjölmiðlafár, en kappinn vildi komast í lið sem gerði alvöru atlögu að titlinum.

Gylfi, sem er orðinn 35 ára gamall, var að skora sitt fyrsta mark í sumar en sennilega ekki það síðasta.