Marc-Andre ter Stegen, markvörður Barcelona, er sennilega á förum í sumar, en félagið telur sig ekki hafa not fyrir hann.
Börsungar eru að fá Joan Garcia frá nágrönnunum í Espanyol og þá verður Wojciech Szczesny, sem tók hanskana af hillunni til að spila með liðinu á síðustu leiktíð, áfram.
Undanfarna daga hefur verið fjallað um óánægju Ter Stegen með stöðu mála, en hann vill helst vera áfram hjá Barcelona. Er hann samningsbundinn til 2028. Stjórinn Hansi Flick og stjórn félagsins vilja hins vegar losa hann.
Nú segir spænski miðillinn Mundo Deportivo frá því að tyrkneska félagið Galatasaray hafi áhuga á þýska markverðinum. Liðið varð meistari í vor og tryggði sér um leið þátttökurétt í deildarkeppni Meistaradeildarinnar í haust.
