FH hefur verið í tómu rugli það sem af er tímabili í Bestu deild karla og er liðið með eitt stig eftir fjóra leiki. Þetta var tekið fyrir í Þungavigtinni.

FH þurfti að þola svekkjandi 3-2 tap gegn KA í gær, þar sem varnarleikur Hafnfirðinga heillaði fáa. Ríkharð Óskar Guðnason segir tvo varnarmenn sem byrjuðu leikinn í gær einfaldlega ekki nógu góða á þessu stigi.

„Tölum bara hreint út. Það eru tveir varnarmenn sem mér finnst eiginlega bara ekki nógu góðir til að spila í efstu deild, Grétar (Snær Gunnarsson) og Birkir (Valur Jónsson). Mér finnst þeir bara ekki nógu góðir,“ sagði hann í Þungavigtinni.

Birkir gekk í raðir FH frá HK í vetur en Grétar kom árið 2023, eftir að hafa verið hjá félaginu ungur að árum einnig.

„Þeir eru búnir að eiga erfitt uppdráttar. Mér finnst Grétar meiri miðjumaður en hafsent,“ sagði Kristján Óli Sigurðsson og hélt áfram.

„Ég held að Ahmad Faqa og Ísak Óli gætu orðið alvöru hafsentapar, en Ísak er ekki klár fyrr en í fyrsta lagi í júní.“