Það sauð gjörsamlega upp úr eftir Kaupmannahafnarslaginn milli FCK og Bröndby í dönsku úrvalsdeildinni á Parken í gær.

Gestirnir frá Bröndby unnu dramatískan sigur í leiknum, 1-2. Sigurmarkið kom úr vítaspyrnu í uppbótartíma og mistókst heimamönnum svo að jafna af vítapunktinum nokkrum mínútum síðar.

Það er gríðarlegur hitti milli þessara liða og stuðningsmanna þeirra og eftir leik fagnaði Patrick Pentz markmaður Bröndby fyrir framan stuðningsmenn FCK. Uppskar hann sitt annað gula spjald og þar með rautt fyrir vikið.

Hófust þá hörð slagsmál úti á vellinum þar sem Pentz fékk að kenna á því. Diant Ramaj markvörður FCK fékk einnig rautt spjald fyrir viðbrögð sín í leikslok og fékk varamarkvörður Bröndby einnig brottvísun.

Pentz viðurkenndi eftir leik að það hafi verið mistök að kveikja í mannskapnum með fögnuði sínum, en hér neðar er myndband af þessu.

Þess má geta að FCK er á toppi deildarinnar með 1 stigs forskot á Midtjylland. Bröndby er 5 stigum á eftir erkifjendum sínum.